घुगुस: (दि. ५ जून) जागतिक पर्यावरण दिनाचे औचित्य साधून लॉयड्स इन्फिनाईट फाउंडेशनने नगरपरिषद घुग्घुस आणि ग्रामपंचायत म्हातारदेवी यांच्या संयुक्त विद्यमाने एका व्यापक कार्यक्रमाचे आयोजन केले. या महत्त्वपूर्ण दिवशी पर्यावरणाच्या संरक्षणाचा संदेश देत, पोलीस ठाणे घुग्घुस आणि ग्रामपंचायत म्हातारदेवी परिसरात मान्यवरांच्या हस्ते वृक्षारोपण करण्यात आले. तसेच, ‘प्लॅस्टिकमुक्त गाव-शहर’ ही दूरगामी संकल्पना प्रत्यक्षात आणण्यासाठी विशेष जनजागृती अभियान राबविण्यात आले. या अभियानांतर्गत उपस्थितांनी आपले गाव आणि शहर प्लास्टिकमुक्त करण्याची सामूहिक प्रतिज्ञा घेतली. कार्यक्रमाचे उद्घाटन आणि अध्यक्षस्थान लॉयड्स मेटल्स अँड एनर्जी लिमिटेडचे युनिट हेड, श्री. वाय. जी. एस. प्रसाद, यांनी भूषविले. याप्रसंगी प्रमुख अतिथी म्हणून नगरपरिषद घुग्घुसचे मुख्याधिकारी श्री. निलेश राजनकर, लॉयड्स मेटल्स अँड एनर्जी लिमिटेडचे वरिष्ठ उपाध्यक्ष श्री. प्रशांत पुरी, उपाध्यक्ष श्री. पवन मेश्राम, घुग्घुस पोलीस ठाण्याचे सहायक ठाणेदार श्री. सचिन तायवाडे, श्री. स्थुल, श्री. कौशिक घोष, श्री. संजय दुधाळे, श्री. संजय तिवारी, आणि श्री. आशिष मासिरकर उपस्थित होते. तसेच, म्हातारदेवीच्या सरपंच सौ. संध्याताई पाटील, उपसरपंच श्री. शंकर उईके, लॉयड्स इन्फिनाईट फाउंडेशनच्या सहायक महाप्रबंधक विद्या पाल आणि श्री. दीपक साळवे यांची उपस्थिती होती सर्व मान्यवरांच्या हस्ते वृक्षारोपण करण्यात आले फाउंडेशनच्या प्रतिनिधींनी आपल्या संबोधनपर भाषणात प्लास्टिकच्या वाढत्या वापरामुळे पर्यावरणावर होणारे गंभीर दुष्परिणाम आणि त्याचे मानवी आरोग्यावर तसेच एकूणच जीवसृष्टीवर होणारे दूरगामी नकारात्मक परिणाम यावर सविस्तर विवेचन केले. विशेषतः ‘एकदा वापरल्या जाणाऱ्या प्लास्टिक’मुळे (Single-use plastic) होणारी पर्यावरणाची हानी त्यांनी अधोरेखित केली आणि ते टाळण्याचे कळकळीचे आवाहन केले. या जनजागृतीचा एक भाग म्हणून, नगरपरिषद घुग्घुसचे मुख्याधिकारी श्री. निलेश राजनकर यांच्या हस्ते उपस्थित मान्यवरांना कापडी पिशव्यांचे वाटप करण्यात आले, जेणेकरून प्लास्टिक पिशव्यांऐवजी कापडी पिशव्यांच्या वापरास प्रोत्साहन मिळावे. यावेळी बोलताना नगरपरिषद घुग्घुसचे मुख्याधिकारी श्री. निलेश राजनकर म्हणाले की, “लॉयड्स इन्फिनाईट फाउंडेशन नेहमीच सामाजिक बांधिलकी जपत विविध सामाजिक आणि पर्यावरणीय उपक्रमांमध्ये सक्रिय सहभाग घेत आले आहे. जागतिक पर्यावरण दिनानिमित्त आयोजित करण्यात आलेले हे ‘प्लॅस्टिकमुक्त गाव-शहर’ जनजागृती अभियान निश्चितपणे स्थानिक पातळीवर प्लास्टिक वापराबाबत समाजात जागरूकता निर्माण करण्यास आणि लोकांच्या सवयींमध्ये सकारात्मक बदल घडवून आणण्यास मदत करेल,” असा दृढ विश्वास त्यांनी व्यक्त केला. तसेच कार्यक्रमात सहभागी झालेल्या सर्व नागरिकांना फळझाडांचे वितरण करण्यात आले. या अभियानाला स्थानिक नागरिकांचा उत्स्फूर्त प्रतिसाद मिळाला. फाउंडेशनचे स्वयंसेवक आणि स्थानिक नागरिक मोठ्या संख्येने या पर्यावरणस्नेही उपक्रमात सहभागी झाले होते, आणि त्यांनी पर्यावरण संरक्षणाचा हा महत्त्वाचा संदेश घराघरात पोहोचवण्याचा संकल्प केला. कार्यक्रमाचे संचालन श्री. अनुराग मत्ते यांनी केले. हा कार्यक्रम यशस्वी करण्यासाठी फाउंडेशनचे श्री. रमण पानपट्टे, सौ. शीतल कौरासे, आणि श्री. श्रीरंग पोतराजे यांनी विशेष परिश्रम घेतले. सर्वांच्या अथक प्रयत्नांमुळेच हा जनजागृतीपर कार्यक्रम यशस्वी झाला आणि पर्यावरण संरक्षणाच्या दिशेने एक महत्त्वाचे पाऊल उचलले गेले.
