*लॉयड्स इन्फिनाईट फाऊंडेशन च्या वतीने घुग्गुस परिसरातील विद्यार्थ्यांना उच्च शिक्षण व करिअर संधी बद्दल मार्गदर्शन*
घुग्गुस : ग्रामीण भागातील विद्यार्थ्यांना उच्च शिक्षणासाठी आर्थिक सहाय्य, सि एल जी ग्रँट स्कॉलरशिप , करिअर नियोजन आणि राष्ट्रीय शैक्षणिक धोरण बाबत सखोल माहिती मिळावी यासाठी लॉयड्स इन्फिनाईट फाऊंडेशनच्या “सि एल जी ग्रँट स्कॉलरशिप” वर आधारित विशेष करिअर मार्गदर्शन उपक्रमाचे आयोजन प्रियदर्शिनी कन्या विद्यालय, घुग्गुस तसेच न्यू इंग्लिश हायस्कूल, पांढरकवडा येथे करण्यात आले. या कार्यक्रमात दोन्ही शाळांतील विद्यार्थी मोठ्या उत्साहाने सहभागी झाले. या मार्गदर्शन सत्राचा मुख्य उद्देश सि एल जी ग्रँट स्कॉलरशिप ही ग्रामीण विद्यार्थ्यांसाठी उपलब्ध असलेली अत्यंत उपयुक्त उच्च शिक्षण सहाय्य योजना सर्व विद्यार्थ्यांपर्यंत पोहोचवणे हा होता. या योजनेमुळे पात्र विद्यार्थ्यांना लॅपटॉप, शैक्षणिक सहाय्य, मार्गदर्शन आणि भावी करिअरसाठी आवश्यक सुविधा मिळू शकतात. विद्यार्थ्यांच्या हातात तंत्रज्ञान पोहोचवून शिक्षण अधिक सुलभ करण्यासाठी ही योजना प्रभावी ठरत आहे. कार्यक्रमाच्या प्रारंभी लॉयड्स मेटल्स अँड एनर्जी लिमिटेडच्या सामाजिक दायित्व विभागाच्या सहाय्यक महाव्यवस्थापक विद्या पाल यांनी सि एल जी ग्रँट स्कॉलरशिप कसा ग्रामीण विद्यार्थ्यांसाठी महत्त्वाचा आहे, आतापर्यंत या योजनेचा कसा लाभ झाला आणि लॉयड्सकडून राबविल्या जाणाऱ्या इतर सामाजिक दायित्व उपक्रमांविषयी प्रास्ताविक केले. कार्यक्रमात विद्यार्थ्यांना विविध करिअर पर्याय, उच्च शिक्षणाच्या दिशा, शाखांची निवड आणि व्यावसायिक संधींबाबत मार्गदर्शन देण्यात आले. त्याचबरोबर सि एल जी ग्रँट स्कॉलरशिप चा उद्देश, पात्रता निकष, अर्ज प्रक्रिया, विद्यार्थ्यांना मिळणारे लाभ आणि आधी लाभ घेतलेल्या विद्यार्थ्यांतील सकारात्मक बदल याची सविस्तर माहिती शेअर करण्यात आली. या कार्यक्रमाला श्रीमती नाथीबाई दामोदर ठाकरसे महिला विद्यापीठ चे संचालक डॉ. राजेश इंगोले प्रमुख पाहुणे म्हणून उपस्थित होते. त्यांनी विद्यार्थ्यांना पुढील शिक्षणातील संधी, मुलींसाठी उपलब्ध विशेष अभ्यासक्रम, रोजगाराच्या संधी आणि राष्ट्रीय शैक्षणिक धोरण 2020 अंतर्गत येणारे बदल याबद्दल माहिती दिली. त्यांच्यासह श्री. वेदानंद आस्तमूल व सौ. अपेक्षा पिंपळे यांनीही SNDT विद्यापीठातील अभ्यासक्रम संरचना, प्रवेश प्रक्रिया, विद्यार्थ्यांच्या सर्वांगीण विकासाबाबत आणि राष्ट्रीय शैक्षणिक धोरण अंतर्गत उपलब्ध नव्या शैक्षणिक संधींबाबत मार्गदर्शन केले. यानंतर लॉयड्स इन्फिनाईट फाऊंडेशनच्या स्नेहा रणदिवे यांनी विद्यार्थ्यांना सि एल जी ग्रँट स्कॉलरशिप योजनेची संपूर्ण प्रक्रिया — पात्रता निकष, लाभ, अर्जाची पद्धत, दस्तावेजांची आवश्यकता, निवड प्रक्रिया — याबाबत सविस्तर मार्गदर्शन केले. तसेच या योजनेमुळे विद्यार्थ्यांच्या शिक्षणात आणि करिअरमध्ये झालेले सकारात्मक बदल त्यांनी प्रत्यक्ष उदाहरणांसह स्पष्ट केले. ग्रामीण विद्यार्थ्यांसाठी हा उपक्रम कसा “भविष्यातील संधींचा मार्ग” ठरतो आहे, यावरही त्यांनी भर दिला. कार्यक्रमादरम्यान विद्यार्थ्यांनी करिअर निवड, शिष्यवृत्ती योजना, NEP अंतर्गत नवीन अभ्यासक्रम, तंत्रज्ञान क्षेत्रातील करिअर इत्यादी अनेक प्रश्न विचारले. सर्व तज्ज्ञांनी त्यांचे निरसन करत विद्यार्थ्यांना योग्य मार्गदर्शन केले. कार्यक्रमाच्या शेवटी दोन्ही शाळांच्या मुख्याध्यापकांनी लॉयड्स सि एल जी ग्रँट स्कॉलरशिप च्या माध्यमातून ग्रामीण विद्यार्थ्यांसाठी नवीन संधी उघडल्याबद्दल लॉयड्स इन्फिनाईट फाऊंडेशनचे मनःपूर्वक आभार मानले. त्यांनी सांगितले की, अशा उपक्रमांमुळे विद्यार्थ्यांच्या शैक्षणिक प्रगतीला चालना मिळते आणि त्यांच्या भविष्यातील करिअरला नवी दिशा मिळते.
