धानोरा येथे विविध विकासकामांचे लोकार्पण समारंभ उत्साहात संपन्न
घुग्घुस : धानोरा भारतरत्न डॉ. बाबासाहेब आंबेडकर यांच्या जयंतीचे औचित्य साधून लॉयड्स इन्फिनाइट फाऊंडेशनच्या सामाजिक दायित्व (CSR) उपक्रमांतर्गत धानोरा येथे विविध विकासकामांचे लोकार्पण व हस्तांतरण (हँडओव्हर) समारंभ मोठ्या उत्साहात व ग्रामस्थांच्या उपस्थितीत पार पडला. सामाजिक समता, शिक्षण आणि सर्वांगीण विकासाचा संदेश देणाऱ्या डॉ. आंबेडकर यांच्या विचारांना अभिवादन करत हा कार्यक्रम साजरा करण्यात आला.
या कार्यक्रमाद्वारे गावाच्या सर्वांगीण विकासासाठी राबविण्यात आलेल्या विविध महत्त्वपूर्ण प्रकल्पांचे उद्घाटन करण्यात आले तसेच संबंधित कामांची अधिकृत हस्तांतरण प्रमाणपत्रे ग्रामपंचायतीकडे सुपूर्द करण्यात आली.
या उपक्रमांतर्गत आरओ वॉटर एटीएमचे उद्घाटन,लॉयड्स कम्युनिटी क्लिनिकअंतर्गत मोफत दवाखान्याचे उद्घाटन, पिण्याच्या पाण्यासाठी बोअरवेल सुविधा तसेच देवा महिला बचत गटासाठी पापड व चिप्स बनविण्याच्या मशिन्सचे उद्घाटन करण्यात आले. या सर्व प्रकल्पांमुळे गावातील नागरिकांच्या आरोग्यसेवा, स्वच्छ पाणीपुरवठा व मूलभूत सुविधांशी संबंधित अडचणींवर प्रभावी तोडगा निघणार असून ग्रामस्थांना मोठा दिलासा मिळणार आहे.
विशेषतः महिला सक्षमीकरणाच्या दृष्टीने देवा महिला बचत गटाला उपलब्ध करून दिलेल्या मशिनमुळे महिलांच्या उत्पादन क्षमतेत लक्षणीय वाढ होणार आहे. पापड व चिप्स उत्पादनाच्या माध्यमातून महिलांना स्वयंरोजगाराच्या नवीन संधी उपलब्ध होऊन त्यांच्या आर्थिक उत्पन्नात वाढ होणार आहे. यामुळे त्यांच्या कुटुंबाच्या आर्थिक स्थितीत सुधारणा होण्यास मदत होईल तसेच महिला स्वावलंबनाच्या दिशेने एक महत्त्वपूर्ण पाऊल ठरेल.
या समारंभाला उद्घाटक म्हणून वाय. जी. एस. प्रसाद, युनिट हेड – लॉयड्स मेटल्स अँड एनर्जी लिमिटेड यांची प्रमुख उपस्थिती लाभली. तसेच प्रमुख पाहुणे म्हणून प्रशांत पुरी (वरिष्ठ उपाध्यक्ष) उपस्थित होते. कार्यक्रमास सहायक महाप्रबंधक डॉ. विद्या पाल, सरपंच श्री. विजय आगारे, उपसरपंच श्री. विनोद खेवले, ग्रामविकास अधिकारी दुधे मॅडम, ग्रामपंचायत सदस्य तसेच गावातील महिला व पुरुष ग्रामस्थ मोठ्या संख्येने उपस्थित होते.
कार्यक्रमादरम्यान मान्यवरांनी आपल्या मनोगतात लॉयड्स इन्फिनाइट फाऊंडेशनच्या सामाजिक कार्याचे कौतुक करत ग्रामीण भागातील नागरिकांच्या गरजांनुसार आरोग्य सुविधा, पाणीपुरवठा, स्वच्छता आणि पायाभूत सुविधा विकसित करण्यासाठी फाऊंडेशन सातत्याने कार्यरत असल्याचे नमूद केले. मोफत दवाखान्यामूळे विशेषतः ग्रामीण व आर्थिकदृष्ट्या दुर्बल घटकांना दर्जेदार आरोग्यसेवा सहज उपलब्ध होणार असल्याचे त्यांनी सांगितले.यावेळी ग्रामस्थांनी समाधान व्यक्त करत लॉयड्स इन्फिनाइट फाऊंडेशनचे मनःपूर्वक आभार मानले.
एकूणच, डॉ. बाबासाहेब आंबेडकर यांच्या जयंतीनिमित्त आयोजित हा कार्यक्रम धानोरा गावाच्या सर्वांगीण विकासाच्या दिशेने एक महत्त्वपूर्ण आणि प्रेरणादायी टप्पा ठरला असून भविष्यातही अशा विविध सामाजिक उपक्रमांद्वारे ग्रामीण विकासाला चालना देण्याचा निर्धार यावेळी व्यक्त करण्यात आला.
